Gruselparty

Ich flüschtere dir liislig is Ohr Mir händ hüt no öppis vor Mir lösched s'Liecht i de ganze Wonig Mir gönd is Bett, aber schlafed nonig Es git e Gruselparty i mim Bett Mit Monschter, Zombies und Skelett Und Aliens, wo bsunders fies Usgsehnd, so wie du und ich Chüssi, Plüschtier, alles isch parat Mir warted, dass de Spuk losgaht Mir hebed eus und mir verzelled Gschichte, wo sich eim d'Haar ufschtelled Es git e Gruselparty i mim Bett Mit Monschter, Zombies und Skelett Und well mer Taschelampe händ Git's Schattebilder a de Wänd Achtung, jetz isch Geischterschtund Ich gschpür, dass öpper is Huus ie chunnt Vom Chileturm hät's zwölfi gschlage Mir händ eus under de Decki vegrabe Es git e Gruselparty i mim Bett Mit Monschter, Zombies und Skelett Und mit eme chlline Gschpängscht Wo jetz schlotteret vor Angscht Im Dunkle schliicht sich e Mumie aa "Isch da öpper, wer isch da?" Und me ghört e Schtimm, so süess wie Honig "Schtärneföifi, wieso schlafeder nonig?" Es git e Gruselparty i mim Bett Mit Monschter, Zombies und Skelett Sogar e Mumie hät's debii Zum Glück isch das nur s'Mami gsi