Walla Ma Aayez

والله ما عايز غير بيت فيه واحدة الصبح بتفرد ضفايرها وعيال بتقوم من النوم تجري عليا من غير حتى ما تفتح عينها والله ما عايز غير كوباية شاي وبوسة حب ورضا بالحال وجرايد أخبارها عال وإبتسامات الناس في الشارع ترجع تاني زي زمان وصباح الفل فـ وشك دايماً من عسكري مهموم تعبان نفسه يسلم خدمة ويجري يروح بيته ينام من كمسري زهقان مـ الزحمة من تاكسي فـ شارع غرقان والله ما عايز إلا تلاتة جنيه تمن الدمغة وختم النسر وكوباية شاي لموظف غلبان والله ما عايز إلا بطاقتي يا ناس حتى ولو من غير عنوان والله ما عايز غير الشغل، لا كلام يعني ولا حديت ولا قالو وقولنا ولت وعجن وحواديت ولا زر ونم وهيصة فاضية وتخبيط قوم أقف وأنت بتتكلم، ضحكة غش وتظبيط والله ما عايز حد عبيط والله ما ناقص تنطيط والله ما عايز بعد الشغل غير إني أروح تعبان من الحر وبتطوح وألقى حبيبة قلبي بتضحك وألقى طراوة بيت بتاخدني ترد الروح هم الدنيا فـ لحظة يروح وألقى عيالي بيجروا عليا ويحضنوا فيا وياخدوا الشنطة يقلبوا فيها وياخدوا الحاجة الحلوة ويجروا وبعد الضهر أقرا الجورنال وإنتي يا أجمل شيء في الدنيا واقفة بتكويلي القمصان وتبصيلي وأنا تعبان والله ما عايز غير حضنك وأتغطى وأنام