والليل يجيب ما يجيب الليل
جايبلي مين المرة دي
غوازي راكبة ضهور الخيل
ولا ديابة فـي توب قاضي
لو جاي طمعان فـي مذلة
في ألف ليل قبلك ولى
رحايا يامة ع الغلة
وع الأعادي اللي تجيلك
سرك قديم يا أم الأسرار
يعدوا روم ويعدوا تتار
قايدة لعداكي غيطان النار
وللحبايب قالدينك
قبل الزمن بزمن قبله
جه النور هنا وربط حبله
على القلوب اللي اتقابلوا
ومشيوا في ضل سبيلك
الحر حر مالوش دية
ومات عشان ما تعيش هي
يكفيني من الناس أغنية
تخلد اسمه فمواويلك
موال بلدنا قديم أصله
كاتب لكل بطل فصله
يوقع ويقوم ويقول وصله
مين غير عياله حيشيلك
وتعيشي ويفرق نيلك
شربات شهيدك عالمخاليق
وتكون دي خطوة جوة طريق
مفيهش خطوة عافاضي
