I ha ihn geschter wieder troffe
Im Gartecenter vo de Stadt
Hinde bi de Zimmerpflanze
Isch er allei umegloffe
Es schiint als würd er tanze
Wie en Schmetterling im Ruusch
Und zwar no zimli elegant
Trotz sim
Bierranze
Er goht langsam hin un her
Und jetzt dunkt er mi scho chli flatterig
Oh jetzt führt er no es Selbstgspröch
Oder wart
Redt er jetzt mit de Pflanze
Jo jetzt redt er mit de Pflanze
Und schiint sich sichtlich z amüsiere
Berührt behutsam ihri Blätter
I gloube er tuet sie analysiere
Und denn bin i zu ihm hi
Ha ihn gfrogt wies ihm goht
Er seit er seig wieder single
Er heig d Leila verloh
Er heig gnue vom zämeläbe
Gnue vo Stress mit schöne Mönsche
Gnue vo chönntsch mer bitte zue lose
Gnue vo was du do seisch findi denäbe
Er erklärt mer d Situation
Werum er d Leila heig lo stoh
Toxischi Kommunikation
Toxischi Kommunikation
Er wett en neui Beziehig
Eini mit Bestand
Drum suecht er hütt en Pflanze
En Pflanze mit Verstand
Er wett en Pflanze mit Verstand
Wo zu ihm passt wie zum Bild a de Wand
Eini wo fescht zu ihm stoht
Stumm mit ihm wachst
Und treue Wurzle schlot
Er suecht en Pflanze mit Stiel
Eini mit Saft
Saft und Appeal
Eini wos fuschtdick hinder de Blätter hett
Und ned viel redt
Er wett en karnivori nebem Bett
Wo gföhrli usgseht und ned jede hett
Eini wo nüt vergisst
Und ned nur i de Not
Sondern immer alli Flöige frisst
Eini für die dunkle Stunde
Wo ihri Blüete i de Nacht ufmacht
Ihre zauberhafti Duft verbreitet
Reine Balsam isch für sini Wunde
Und spöter hani gseh wie er
Das Gartecenter denn verloht
Für sini Liebi im Topf hett er
No Pflanzeschutzmittel gfunde
Natur und Mönsch im Einklang
Und d Welt wird en bessere Ort
I find er macht en ganz
Grandiose Abgang
