Cità altera, cità maiò, arritta è fiera, cità di i sgiò,
Fatta par sparta, fatta par dà, campà sempri in cumunità,
A li to peda, lu Rizzanesi, fiumu sacratu di i Sartinesi,
Si scola lindu in la piana, da u Tallanesu sin'à Pruprià,
Stendi u so sguardu sin'à mu tagna, quassu li Forchi, duva và l'altagna,
Zonza, Bavedda è Surbuddà, so li paesi ch'edda vedi in dà.
E vedi Cagna à lu meziornu, l'omu ti varda tuttu lu ghjornu,
Di punta ad edda, cu hè Roccapina, hè la so spiaghja la più divina,
E lu lionu a sà curà e a fighjula in eternità,
E ci hè ancu una turricedda, chi si ni stà, zitta e ribedda,
E lu calvariu di San'Damianu, di la cità hè lu vardianu,
E feghja è cura à Sartè, com'una guida lu so rè,
E li so mura sò li rampali contr'à u nemicu è lu furdanu,
Daretu ad edda, ti ni stà cheta, pà piattà tutti li to sicreti,
Ci hè chi Sartè hà un destinu, pà certi, ùn vali un cinquinu,
Par edda, ùn ci sarà mai bè, ma so ghjilosi di Sartè,
Ci hè tra Borgu è Sant'Anna, ci so nati pienti è affani,
Ci era vindetta da lu bisbigliu, danni, sciaguri è parapiglia,
Da piazza Porta à Manichedda, è da Sant'Anna à la scaledda,
Stretti, carrughji, li to ghjuvedda, loca di ghjocu par li ziteddi,
E ci hè lu corsu par spassighjà, da man'à sera, ci hè da cuntà,
Tutti li fatta di la ghjurnata, tutti li foli di sta cuntrata.
Vennari Santu, contr'à u piccatu, u catinacciu, croci hà purtatu,
Santa Maria, ghjesgia maiò, aprarà tutti li so purtò,
L'omu farà lu so viaghju è mandarà un gran'missaghju,
Pà Cursichedda... Paci eterna... Scaccià casticu, dolu e pena.
Cità altera, cità maiò, arritta e fiera, cità di i sgiò,
Fatta par sparta, fatta par dà, campà sempri in cumunità.
